أشهر مجموعة نكت مضحكة عراقية

أحلى نكت مضحكة عراقية

يمتلك العراقيون حس فكاهي مميز عن جميع البلدان العربية، فهو شعب يحب المرح والفكاهة وتأليف النكات، وفي هذا المقال جمعنا لكم مجموعة نكت مضحكة عراقية ستنسيكم الهموم.

نكت مضحكة عراقية

إذا كنت تبحث عن نكته جديدة مضحكة، تنسيك ضغوط الحياة، وتغير مزاجك أنصحك بقراءة النكت العراقية الآتية:

أكو طلاب اثنين واحد اسمه حامد والآخر اسمه محمد، اجو جداد على المدرسة كعدوا اتنينهم بأول رحلة المدرس حب يتعرف عليهم كال للأول: كوم شسمك، كال حامد، كال شتحب تصير من تكبر كال: أتمنى أصير دكتور وأتزوج وحدة حلوة وادللهه واشتريلها سيارة آخر موديل واعلمها السياقة وشتريد أنطيها، كال أكعد، كوم الثاني كاله: شسمك، كال محمد، كال: شتحب تصير كاله: أتمنى أصير مرت حامد.
أكو واحد يكول: فيوم صعدت كيا والسايق مشغل أغاني عالية حيل ويدك هورن وماخد الشارع عرض بطول، والعجيبة من ماكو أحد من الركاب اعترض على تصرفاته وكلهم ساكتين، يكول اتشجعت وكلتله: عمي بعد عمك ترى مو هيج السياقة، شوية نصي المسجل وسوق على كيفك، يكول التفت على السايق وكالي: عمي أنت أصلاً صعدت ويانا غلط، احنا عائلة ورايحين عرس أخوي وأنت من صعدت وي اخوي اني ما ردت أفشلك، وكلت أوصلك بطريقي، يكول من فشلتي كمت أهلهل وياهم.
أم سعدون سمعت من الناس بأن أبو سعدون يريد يتزوج عليها، فسلكت أربع بيضات ولونت كل بيضة بلون، وحطتهن على الريوك، شافهن أبو سعدون وسألها: ليش كل واحدة لون؟ شني الفرق بيناتهن؟ كالتله أم سعدون: تظوكهن أول، بعد ما أكلهن أبو سعدون لكاهن نفس الطعم، كاللها ماكو فرق بيناتهن، كالتله شفت يا ابو سعدون النسوان هم كلهن نفس الشي بس يختلف لونهن وشكلهن، كاللها أبو سعدون: كلامج صحيح، بس تعرفين من اكلتهن شنو اكتشفت؟ إنه الواحد ما يشبع إلا إذا أكل أربع بيضات.
مسطول عنده مرايه بالكنتور فتحهه بالليل شاف نفسه اخترع، وراح خابر الشرطة وكلهم عندي حرامي بالكنتور، وصل الشرطي جان يفتح الكنتور وشاف نفسه هماتين جان يضرب المسطول كف كله مدام عندك شرطي ليش داز علينه.
واحدة سألت زوجها كالتلله: إذا متت شراح يصير بك؟ كللها: أتخبل غير، كالت: يعني ما راح تتزوج بعدي؟ كاللها: والله عاد المخبل كل شي يسوي.
عجوز صعدت ويه أبو تكسي وكل شويه تناوشه فستق كلهه حجيه شبعت بس كليلي هذا الفستق منين حلو وكلش عجبني، كللته: لا يمه جابولي سنيكر بس ما عندي ضروس جاي أمص الكاكو منهن واطيك الفستق، يقلك السايق شهر يتمضمض بكاز.
واحد كاعد ويه زوجته عالبحر والمكان فارغ وهدوء، الزوجة شافته يباوع يمين ويسار كيفت كالت هسه راح يبوسني، كللها: تصدقين لو ذبحتج هنا ولا واحد راح يدري.
أكو واحد كردي يركض بالشارع، شافه واحد، وقفه وكاله تبيني أوصلك، قاله لا والله تراني مستعجل وايد.
عراقي رجع للعراق بعد الغربة، فأول منزل من الطائرة خله الجنطة بالكاع ودنك ايبوس تراب الوطن، رفع راسه ملكه الجنطه، كال رجعنا لطيحان الحظ.
اكو فد واحد يبوك، أمه ودته لسيد وسواله حرز، وكاللها ما عليج ابنج بعد ما يبوك، فلمن طلعوا من بيت السيد يمشي على كيف كيفه، فكلتله أمه امشي حيل، كال على كيفج مو أنعال السيد كلش جبير.
واحد يروح للجامعة بـ مطي 7 سنين، ثامن سنة اجه مشي سئلو أصدقائه كلوله وين المطي كالهم: اتخرج واني بعدني.
مدارس العراق صار 50 سنة ما عدهم مكان للسفرات غير الزوراء بحيث القرد يخلي إيده على جتف الطالب ويكلله: أنت مو أخو فلان بشرني تخرج بعده.

أجمل نكات عراقية تموت من الضحك

اكو واحد ياكل تمن بخاشوكة طويلة، كالوله: ليش تاكل بخاشوكة طويلة؟ كللهم: الطبيب كلالي اشكد ماتكدر ابتعد عن التمن.
اكو أرنب جان ياكل جزر، من كبر صار ياكل مدن.
مو كلمن يحط إيده على ضهرك يواسيك، يمكن ماكل جبس ويريد يمسح إيده بيك.
سكران يشتري عرك بالدين وما يسدد، كله يويلك من الله من نتحاسب بيوم القيامه، كله السكران: لو أنت زلمة اشكي لربك.
أعمى ومخبل اشتغلوا بمطعم فلافل، الأعمى يذب بصف الطاوة والمخبل يسوي تششششششش.
واحد يكول عندي نقال خربان طاح عراس مرتي ورجع يشتغل، وهسه عندي مكيف عطلان ومحتار شلون افتح الموضوع وياها.
الشعب العراقي كلش عجوزي لدرجة يحب اللالنكي أكثر من البرتقال لأن يتكشر بسرعة.
مرة 3 محششين رايدين يحضروا حفل أم كلثوم وما عدهم تذاكر، فواحد منهم راح للحارس كاله: أني الموسيقي فدخل، والثاني كاله: اني المايسترو فدخل، الثالث احتار شيكول، فراح للحارس وكله: اني كلثوم وأريد أمي.
واحدة زعلانة من زوجها اجه وكت الغده صبت الأكل وطلعت، كاللها زوجها: تعالي تغدي، كالت: ما أريد نفسي مسدودة، راسا بنتها الصغيرة طفرت كالت وأني همين ما أريد أكلت بالمطبخ ويا ماما.
عجوز راحت الصيدليه تشتري علاج للمفاصل، كالها الصيدلي آمري يا قمر، رمت العكاز وكالت مرطب شفايف فديتك.
أكو واحد سأل لبنانية شنو اسمج؟ كلتله: يارا ياسين، وانت شنو اسمك؟ كللها: يا حاء يا جيم.
دخل البيت على زوجته حزين، كلتله شبيك، كللها: أمر السلطان بقطع رقبة من لم يتزوج الثانية، كلتله: هنيئاً لك الشهادة.
واحد يغازل مرته كاللها: لو انتي بالهند جان عبدوج فكالتله مرته: ليش اني ملاك؟ كاللها: لا بقرة.
واحد محشش راح يخطب بنية كالوله: المهر عشرة ملايين، كال: شدعوة لكيت وحدة بمليونين وحامل.
ما يقهرني غير اللي يكول أنت كلش حلو من الداخل، أي والله عندي بنكرياس يجنن وزوج جلاويى على كيف كيفك.
محشش اشتره سماعات رجعهم ثاني يوم صاحب المحل كاله ليش، كاله: اتنينهم نفس الأغنية.
واحد عراقي عنده صديق أمريكي، راحوا على أمريكا وكعدوا بيت الأمريكي، الأمريكي طلع دولار من جيبه وانطاه للجلب مالته وكاله: جيب باكيت جكاير، وراح الجلب وجاب باكيت، العراقي قال والله يابة هذا ذكي، بعد فترة العراقي والأمريكي كعدوا ببيت العراقي، العراقي طلع ألف من جيبته وانطاها للجلب مالته وكاله: روح جيب باكيت جكاير، فالجلب كام ينبح، الأمريكي كال: الجلب مالتك شو يكول، رد العراقي كان يكول خليها على حسابي.
اكو ولد عراقي سافر بالطياره، فهو مسافر اجته المضيفة اطته بسكويت كله أدري اليوم شني ماخبزات.
كلشي يتغير بالعراق إلا هدايا الأعراس، لو تعرس بتموز يجيبولك بطانية.
فقط بالعراق إذا واحد راد يفتح باب الحمام ولكه الباب مقفول، يسأل: أكو واحد جوه، لا الحمام ضايج ويريد يكعد لوحده.
الزوجة: وش الرسايل اللي تجيك تالي اللي، الزوج: من شركة الاتصالات، الزوجة: شركة الاتصالات تكولك ما أقدر اعيش بدونك، الزوج: هددتهم أحول موبايلي، صامل المجرم.
أكو واحدة أهدت واحد بدوي ببغاء، قامت اتصلت عليه تسأله عن الهدية، كال لها: عادي طعمه مثل الدجاج ماكو فارج.
شكد مؤدب الزوج العراقي، حتى يوم يريد يغضب ع زوجته يستأذنها ويكول: تريدين أنعل وأديش هسه، ترد عليه لا حبي خلها لباجر.
اكو طالب كسلان بالانكليزي كل مرة المعلم يوقع على دفتره ويكتبله دونكي يعني حمار، فمره ما كتبله دونكي بس وقع، فالطالب كاله: أستاذ نسيت تكتب اسمك.
واحد يكول لصاحبه: زوجتي ماتت وأحاول أبجي من الصبح ما قدرت أنزل ولا دمعه شسوي، كاله: تخيل إنها رجعت.
عراقي رجع عبيته لاقى الجيران متجمعين، كللهم: خير شو في يا جماعة؟ كلله: مرتك أخدها السيل، كال: والله من لما بلشت شتا كلت هاالسنة سنة خير.

نكت عراقية جديدة بالباكيت

رغم أن اللهجة العراقية قد تكون صعبة على البعض، إلا إنني أوعدك بأن النكات الآتية ستضحكك من قلبك:
واحد مخبل اشتغل بالشرطة، ونطوه سلاح وكلوله منع تجوال اليوم اللي تشوفه وره 12 كتله، شاف واحد الساعة 11:45 كتله، كلوله: ليش كتلته، كللهم أعرفه بيتهم بعيد ما يلحك يوصل.
أكو واحد غبي خطف بنت غبية بنص الطريق صارت تعيط، كلها تسكتين لو انزلج، كلتله يله رح اسكت.
نصيحة للبنات إذا وحده كالتلج لهسه ما تزوجتي كوليلها: لا انتظر رجلج يطلكج علمود تحرم تسألج مرة ثانية.
محشش قابل واحد بالشارع كاله: مرحبا عادل كيفج شو اخبارج، ليش متغير شكلج؟ رد عليه وكله: يخوي أنا ماني بعادل، رد عليه المحشش وكله: ما كافي مغير شكلج وغيرت اسمك كمان.
عجوز راحت عالمستشفى مع ابتها، كشف عليها الطبيب وكال: أمك تعاني من الوحدة ولازم تزوجها واحد عمره خمسين، وهم طالعين تكوله أمه: شفت شلون ياوليدي لكن الله يعينك وإذا ما لكيت واحد عمره خمسين شوفلك اثنين من ابو خمسة وعشرين.
واحد عراقي كلش بخيل قرر يشتري كيلو لحم، فاجاه فقير راد يحرجه كدام الناس، فكله: يرحم والديك ما تعطيني شويه لحم صارلي 6 شهر ما ضايك طعم اللحم؟ كاله البخيل: الله وكيلك نفس الطعم ما تغير شي.
واحد رح عـ صيدلية اسمها (صيدلية البركة) طب وشاف الوضع جوه استغرب كلشي موجود حجمه جبير، قطرة العين بكبر دبة الغاز، دواء الكحة بكبر دبة المي، حباية براسيتول دكول كرصه خبز، سأل الصيدلي: هاي ليش احجامهم هيج يا معود، كاله: مو اسم الصيدلية البركة كل شي مبارك بيه وجبير، تفضل محتاج شي؟ كاله: لا والله كنت جاي عـ تحاميل بس صرت زين الحمد لله.
اكو واحدة كالت لزوجها: إذا متت أنت غسلني، كاللها: أنتي بس موتي حتى شعرج اشسوره.
إذا سمعت عراقي يكول خرب عمي، تره ما عنده مشكلة وي عمه، بس هاي علامة التعجب.
اكو واحد لكه زوجته ويه واحد عالسطح، سئله: شجابك هنا؟ كاله: أنا عسكري مظلي ونزلت بالغلط ع السطح، رد المحشش: يخي تدربوا زين امبارح لكيت اثنين بالحمام وكالولي احنا من البحرية.
أب يسأل ابنه: لو خيروك بين العقل والمال شنو تختار، الابن كال المال، رد الأب: وأني اختار العقل، ابتسم الابن وكال: والله كل واحد يختار اللي ناقصه.
واحدة غبية اجها أبوها يبشرها مبروووك صار عندج أخو جديد، كلتله لا تكول لماما خليها مفاجأة.
محشش معجب بجارته وزجها ميت، كال خل اروح اصارحها، دك الباب طلعتله بدون مكياج، من الصدمه كاللها ماكو أخبار عن المرحوم.
أكو بنت حطت صورة حبيبها حالة واتساب، وسألها حبيبها الثاني منو هذا، كالتله هذا أخوي، كللها لا تخبليني هذا اخوي أنا.
واحد سأل شيخ كله: شيخنه انه اكلت سمجة وخبزتين حارات وياهن طرشي، وبعدين اتذكرت انه صايم، هسه شسوي؟ الشيخ كاله: سوي جاي.